Plaid Cymru Pontypridd Wrth galon y gymuned

Wel, am Haf! Nid yn unig roedd y tywydd yn rhyfeddol, ond roedd Pontypridd yn llawn bwrlwm gyda digwyddiadau, fel Parti Ponty a Cegaid o Fwyd Cymru.

Fel bob amser, os oes angen fy help arnoch gyda rhywbeth, dewch i gysylltiad.
Byddwn wrth fy modd yn clywed gennych.

Diweddariad – Arolwg Tyllau yn y ffordd

Diolch i bawb a gwblhaodd yr arolwg tyllau yn y ffordd, a dweud wrthyf am eu lleoliad yn ogystal a darnau o ffyrdd oedd angen gwyneb newydd. Rwy'n falch iawn o weld gwaith wedi ei gwblhau ar Daren Ddu Road ar ôl ymgyrchu am flwyddyn, ynghyd â nifer o strydoedd yn Graigwen. Os ydych chi'n gwybod am unrhyw dyllau neu ffyrdd eraill y mae angen sylw arnynt, rhowch wybod i mi os gwelwch yn dda.

Coed a Gwrychoedd
Yn dilyn y tywydd braf, mae nifer o goed a gwrychoedd wedi tyfu ac mae llawer o drigolion wedi cysylltu â mi â phryderon nad yw cymdogion yn eu torri'n ddigonol, gan felly rwystro eu golygfeydd neu achosi problemau yn eu gerddi. Er bod rhai rheoliadau y gall swyddogion y Cyngor eu gweithredu i gefnogi trigolion, maent bob amser yn annog unrhyw un sydd â phryderon i siarad â'u cymdogion a cheisio dod i gytundeb. Efallai y byddai'n ddefnyddiol pe bai pawb ohonom â gardd yn cymryd yr amser i ystyried pa effaith mae ein coed a'n gwrychoedd yn ei gael ar eraill, a chymryd y camau angenrheidiol fel bod modd osgoi proses fwy ffurfiol.

Canol y Dref

Mae gwaith yn parhau i symud rhagddo ar safle’r hen ganolfan siopa Dyffryn Taf. Rydym wedi disgwyl yn hir i hyn gael ei wireddu, ond gobeithio bydd cwblhau’r prosiect yn sbardun i drawsnewid dyfodol y Dref.

Bloc gwaith coed hen Ysgol Coedylan
Yn gynnar ym mis Awst, cytunodd pwyllgor cynllunio Cyngor RhCT i ddymchwel yr adeilad hanesyddol hwn a chaniatau adeilad newydd. Gwn nad dyma'r canlyniad roedd nifer o drigolion ei eisiau, gan eu bod yn dymuno gweld yr adeilad wedi ei adnewyddu a'i achub ar gyfer y dyfodol, ac mae'n ddrwg gen i fod ein hymgyrch wedi methu. Hoffwn dalu teyrnged arbennig i un o’n trigolion lleol, Louise Jones, a gydlynodd yr ymgyrch gan gynnwys y ddeiseb. Nawr bod penderfyniad wedi'i wneud fodd bynnag, edrychaf ymlaen at groesawu'r trigolion newydd a fydd yn symud i'r datblygiad yn y dyfodol agos.

Ysbwriel
Mae llawer o drigolion wedi cysylltu dros yr wythnosau diwethaf i roi gwybod i mi am broblemau sbwriel mewn gwahanol rannau o'r ward. Ar ôl cais gen i, mae swyddogion y Cyngor wedi bod yn mynd o gwmpas y ward yn rheolaidd, i wagio biniau, codi sbwriel a hefyd gwirio nad yw biniau'n cael eu gadael ar ochr y ffordd ar ddiwrnodau na ddylent fod. Os oes unrhyw broblemau yn parhau yn eich stryd, cysylltwch.