Plaid Cymru Pontypridd Wrth galon y gymuned

Mae’r ysbryd cymunedol ar ôl y llifogydd ym Mhontypridd wedi cael ei ddisgrifio fel rhyfeddol gan Heledd Fychan ac Eleri Griffiths, Cynghorwyr Plaid Cymru. 

Mae’r cynghorwyr wedi bod yn gweithio’n ddi-daw gyda’u cymunedau yn glanhau ar ol y llifogydd dinistriol achoswyd gan Storm Dennis.

Dywedodd Heledd Fychan, Cynghorydd Ward Tref Pontypridd:  

“Mae pawb wedi bod yn gweithio oriau maith am ddyddiau yn glanhau ar ôl y llifogydd. Nes eich bod yn gweld â’ch llygaid eich hun, anodd yw credu maint y difrod i gymaint o gartrefi, busnesau, parciau a strwythurau. Mae’r cyfan mor dorcalonnus. 

“Bydd hi’n cymryd llawer o fisoedd i bethau ddod yn ôl i drefn, ac mae cymaint o unigolion a theuluoedd yn ansicr ynghylch lle y byddent yn byw dros y misoedd nesaf tra bydd eu cartrefi’n cael eu hatgyweirio.  

“Er mai pennod hir fydd hon, mae’n rhyfeddol yr hyn sydd wedi’i gyflawni’n barod gan waith caled, diflino ac ymroddiad cymaint o wirfoddolwyr o’n cymuned a thu hwnt a hefyd yr holl roddion hael. Mae hi’n anrhydedd i fod yn rhan o uned gefnogi Canolfan Gymunedol Trallwn ac i weld y gwahaniaeth sy’n cael ei gyflawni wrth weithio gyda’n gilydd.  

“Roeddem mor ddiolchgar am y parseli bwyd dderbyniom ni a da o beth oedd creu’r drefn o fynd allan gyda bwyd I’r ardaloedd ddioddefodd.”  

Ychwanegodd Eleri Griffiths, Cyngorydd Sir Ward y Rhondda gyfagos:

“Yn fy ward i yn Nhrehafod mae’r gymuned wedi dioddef yn arw oherwydd y llifogydd, ond yr hyn sydd wedi bod yn galonogol yw’r ysbryd cymunedol rhagorol. Roedd llawer o’r trigolion yn brin o yswiriant i’w helpu i amnewid eu heiddo ac i atgyweirio’u tai, felly mae’r gymuned yn dod yng nghyd i’w cynorthwyo. Mae Plaid Cymru’n galw y Lywodraeth San Steffan i sicrhau bod yswiriant tai fforddiadwy ar gyfer pawb yng Nghymru. Ni ddylai unrhyw un fod mewn perygl o golli popeth oherwydd lleoliad eu cartref.”